ମୋତେ ଖୋଜି ଖୋଜି ଯୀଶୁ ଅଇଲେ

ମୋ ଛାର ପାଇଁକି ସରଗ ତିଆଗି

ଅଶେଷ ଯାତନା ସହିଲେ

ହଜିଥିଲି ମୁଁ ଯେ ଜଗତ ପ୍ରପଞ୍ଚେ

ଖୋଜି ଖୋଜି ଶେଷେ ପାଇଲେ

ଆହା କି ଆଦରେ ପରମାନନ୍ଦରେ

ଧୂଳି ଝାଡି କୋଳେ ଧଇଲେ

ଜୀବନ ଦେବତା ଅତି ମଳିନତା

ଦେଖି ମନେ ବ୍ୟଥା ପାଇଲେ

ନିଗାଡି ନିଜର ହୃଦୟ ରୁଧିର

ନିଜ ଅନୁରୂପେ ଧୋଇଲେ

ମୋର ଦୁଃଖ ଚିନ୍ତା ଦୋଷ ଦୁର୍ବଳତା

ଆପଣେ ଶ୍ରୀଅଙ୍ଗେ ବହିଲେ

ମରଣ ଦାରୁଣ ପଣରେ ନବୀନ

ଜୀବନର ମାର୍ଗ ନିହିଲେ

ମରଣର ଭିତି କୃଶଯନ୍ତ୍ରେ ଇତି

କରି ମହା ମୁକ୍ତି ବିହିଲେ

ସରଗ କାହାଣୀ ମୋ ପାଶେ ବଖାଣି

ପ୍ରେମରେ ପରାଣ ମୋହିଲେ

ସଫଳ ଜୀବନ ଯୀଶୁ ଶ୍ରୀ ଚରଣ

ପରିଚାର ପଣ ପାଇଲେ

ବୃଥା ଏ ଜନମ ପୂଜା ଅନୁଷ୍ଠାନ

ମହାପ୍ରଭୁ କୃପା ନୋହିଲେ